OGGEND SPORT: Die Cheetahs maak gereed, Breetzke kry ‘n oproep na die toetsgroep en, die SA legendes storm onoorwonne na die halfeindronde
Ons begin met rugby: Die Toyota Cheetahs begin Sondag hul 2026/27-veldtog in die EPCR Challenge Cup met ’n wegwedstryd teen die Franse klub Aviron Bayonnais in Bayonne.
Die Vrystaters sal op ’n moeilike toets in Frankryk voorbereid moet wees wanneer hulle teen die Top 14-span op Stade Jean Dauger uitdraf.
Volgens die Cheetahs se amptelike webwerf is ’n toerspan aangekondig vir die eerste wedstryd van die veldtog. Die Cheetahs se Europese veldtog volg nadat hulle hul Toyota Challenge-toer in Georgia afgesluit het. Hulle het Lusitanos met 38-26 geklop, maar daarna met 22-19 teen Iberians verloor voordat hulle hul laaste wedstryd teen Black Lion gespeel het.
Sondag se kragmeting in Bayonne begin ’n belangrike nuwe hoofstuk vir die Cheetahs, wat sal hoop om hul Europese veldtog met ’n sterk vertoning af te skop.
In krieket-nuus: Die Proteas het ’n groep van 17 spelers aangewys vir die tweede Dafabet-toets teen Australië, wat Sondag op St George’s Park in Gqeberha begin.
Matthew Breetzke vervang Tristan Stubbs in die enigste verandering aan die groep sedert die eerste toets, terwyl Ryan Rickelton die paaltjiewagterspligte vir die komende wedstryd sal oorneem.
Tony de Zorzi is steeds nie beskikbaar vir keuring nie, aangesien hy voortgaan met sy herstel van ’n besering aan sy linkerdyspier. Afrigter, Shukri Conrad, sê die span is gereed om te verbeter op hul vertoning.
LUISTER HIER:
Ons sluit af met nog krieket: AB de Villiers en sy Suid-Afrikaanse span het die ligafase van die Wêreldkampioenskap vir Legendes onoorwonne afgesluit, met Suid-Afrika wat 210-3 aangeteken het voordat Bangladesj vir 122 uitgeboul is.
JP Duminy het met ’n onoorwonne 89 lopies van 49 balle, met sewe viere en vyf sesse, die botoon gevoer, terwyl Morné van Wyk 30 en Colin Ingram ’n onoorwonne 40 bygedra het. Hardus Viljoen het met 5-16 in net minder as vier boulbeurte uitgeblink, terwyl Robbie Frylinck 2-20 geneem het, nadat Bangladesj vroeg tot 29-5 teruggesak het.
Suid-Afrika pak Engeland Vrydag in die halfeindronde, terwyl Australië en die Wes-Indiese Eilande mekaar in die ander halfeindstryd ontmoet.
Comments