OGGEND SPORT: Die Junior Bok-dokter red ‘n passasier, Van Voorst lei die SA o.19-vroue na ‘n reeksvoordeel en Fox maak geskiedenis by die Britse Ope

Saamgestel deur Jana Roos
Jul 21
2 min read

Ons skop af met rugby-nuus: Die Junior Springbok-span se dokter, Clement Plaatjies, het ’n vrou te hulp gesnel nadat sy tydens die span se vlug van Johannesburg na Kaapstad inmekaargesak het, wat die vliegtuig gedwing het om na O.R. Tambo-lughawe terug te keer.

Hoofafrigter, Kevin Foote, sê Plaatjies het die vrou gereanimeer nadat hy geen polsslag kon opspoor nie, waarna suurstof toegedien is en die vlug teruggedraai het terwyl hulle reeds bo Bloemfontein was.

Nooddienste het die vliegtuig in Johannesburg ingewag en die vrou is uiteindelik gestabiliseer, waarna haar bagasie verwyder is voordat die vlug later weer na Kaapstad vertrek het.

Die Junior Bokke het uiteindelik meer as drie uur later as beplan in Kaapstad geland.

In krieket-nuus: Kaptein, Mieke van Voorst, het ‘n wedstrydwennende 57 lopies van 42 balle aangeteken om die Suid-Afrikaanse Onder-19-vrouespan na ‘n oorwinning van 52 lopies teen Pakistan in die derde internasionale T20-jeugwedstryd te lei.

Van Voorst het Suid-Afrika gehelp om te herstel nadat die span op 33-3 te staan gekom het en het daarna belangrike vennootskappe gevorm met Chris-Mari Bezuidenhout en die onoorwonne Daneli Boshoff, wat 39 lopies aangeteken het. Die besoekers het ‘n totaal van 158-6 op die telbord geplaas wat hulle ‘n voorsprong van 2-1 in die reeks van vyf wedstryde gee, terwyl Van Voorst as die speler van die wedstryd aangewys is.

En, in gholf-nuus: Ryan Fox van Nieu-Seeland het die Britse Ope gewen nadat hy ‘n laaste ronde van 68 gespeel het om op 270 houe te eindig, terwyl die Suid-Afrikaner Casey Jarvis met ‘n indrukwekkende 66 saam sesde op 274 geëindig het.

Fox is die eerste Nieu-Seelander in 63 jaar om die Claret Jug te wen en het Cameron Young met een hou geklop, met Sam Burns derde en Scottie Scheffler en Tommy Fleetwood gesamentlik in die vierde plek.

In die DP World Tour se Corales Puntacana-kampioenskap het Stefano Mazzoli van Italië met een hou geseëvier, met Garrick Higgo as die beste Suid-Afrikaner op 280 houe.