OGGEND SPORT: Die Protea-vroue kondig ‘n jong span vir die Zimbabwe-reeks aan, die Cheetahs se Erich Visser kry ‘n dubbele eerbewys en Kyrgios is voorlopig geskors na ‘n kokaïentoets

Saamgestel deur Jana Roos
Aug 20
2 min read

Updated: Aug 21

Ons slaan af met krieket: Die Protea-vroue het ‘n span van 15 spelers aangekondig vir hul eerste T20-internasionale reeks ooit teen Zimbabwe, met vyf wedstryde wat van 11 tot 19 September in Bulawayo geskeduleer is.

Kaptein Laura Wolvaardt sal die span lei, wat nuwelinge, Caitlin Wyngaard, Nthabiseng Nini en Luyanda Nzuza insluit, ná hul uitstekende vertonings vir die SA Opkomende Vroue. Die span sluit ook verskeie gevestigde spelers in wat die onlangse T20-Wêreldbeker in Engeland misgeloop het, terwyl gereelde spelers soos Sinalo Jafta, Karabo Meso, Kayla Reyneke en Annerie Dercksen ervaring na die groep bring.

Afrigter, Mandla Mashimbyi, sê die toer sal waardevolle internasionale ervaring en voorbereiding bied vir volgende jaar se IKR-Kampioenetrofee vir vroue in Februarie.

LUISTER HIER:

20260819sMandla-Mashimbyi

0:32

In rugby-nuus: Die Toyota Cheetahs-skrumskakel, Erich Visser, is vir sy uitstekende jaar in rugby by die Vrystaatse Sporttoekennings vereer.

Luidens ‘n verklaring is Visser as Sportman van die Jaar én Sportster van die Jaar aangewys.

Hy het onder meer die Junior Springbokke by die Wêreldrugby o.20-kampioenskap in 2025 verteenwoordig, en sy jongste toekennings bevestig sy status as een van die Vrystaat se uitblinkers op sportgebied.

En, in tennis-nuus: Die Australiese tennisster, Nick Kyrgios, is voorlopig geskors van alle vorme van tennis nadat hy positief getoets het vir kokaïen by ‘n ATP-geleentheid in Mallorca in Junie.

Die 31-jarige het die oortreding op sosiale media erken en volle verantwoordelikheid geneem, terwyl hy sê dat beserings en die vooruitsig van sy loopbaanbeëindiging ‘n swaar fisiese en geestelike tol geëis het.

Kyrgios kan teen die skorsing appelleer, maar het dit nie gedoen nie, en hy word tans verbied om te speel, af te rig of geleenthede by te woon wat deur tennisbeheerliggame georganiseer of goedgekeur word.