OGGEND SPORT: Die Wallabies verwag ’n volgende vlak teen die Bokke, Sabalenka is beboet ná haar uitbarsting en, die Protea Warriors mik daarop om hul titel te verdedig
In rugby-nuus: Wallabies-afrigter, Les Kiss, erken Australië sal hul fisieke spel en intensiteit aansienlik moet opskerp wanneer hulle op 27 September in Perth teen die Springbokke uitdraf.
Kiss het sy groep aangekondig met die jong losskakel, Harry McLaughlin-Phillips wat die beseerde Carter Gordon vervang, terwyl Jordan Petaia ná drie jaar sy terugkeer na internasionale rugby maak.
Nadat hy gesien het hoe die Springbokke en All Blacks mekaar oor vier toetse behoorlik uitgedaag het, besef Kiss die wêreldkampioene sal ’n veel groter uitdaging wees as Japan en Argentinië.
Kiss sê die Wallabies weet hulle moet op sekere gebiede verbeter en hard werk om gereed te wees vir die stryd, voordat hulle in Oktober ook twee keer teen die All Blacks te staan kom.
In tennis-nuus: Aryna Sabalenka is deur die USTA beboet met seweduisend-500 Amerikaanse dollar nadat sy ‘n bal die skare in geslaan het tydens haar nederlaag in drie stelle teen Elena Rybakina in die eindstryd van die Amerikaanse Ope, terwyl sy ook haar raket stukkend geslaan en ‘n kameraman verbaal aangeval het.
Sabalenka hoef nie oor die finansiële gevolge bekommerd te wees nie, aangesien sy twee-komma-agt miljoen dollar as naaswenner verdien het, terwyl Venus en Serena Williams straf vrygespring het nadat hulle nie hul verpligte perskonferensie ná hul nederlaag in die dubbelspel bygewoon het nie.
Intussen berei Carlos Alcaraz voor vir ‘n besige einde aan die seisoen ná sy terugkeer van ‘n polsbesering.
Alcaraz sal aan die Laver-beker, Japan-ope, Sjanghai-meesters, Six Kings Slam, Parys-meesters en ATP Finals deelneem, met ‘n moontlike verskyning in die Davis Cup Finals om sy 2026-veldtog af te sluit.
En, in netbal-nuus: Doelskieter van die Protea Warriors, Lutendo Maiwashe, glo Suid-Afrika beskik oor die nodige ervaring en talent om sy Afrika-kampioenskapstitel later vandeesmaand in Kenia suksesvol te verdedig.
Netbal Suid-Afrika het ‘n groep van 15 spelers vir die toernooi in Nairobi van 19 tot 26 September aangekondig, en Maiwashe prys die balans tussen ervare spelers en opkomende talent.
Hy sê die mededinging om plekke was hewig tydens die keuringskamp in Johannesburg, met spelers wat gretig was om die land te verteenwoordig en op die afrigtingspan indruk te maak.
Die Protea Warriors het hul voorbereiding versterk met ‘n oorwinning van 42-31 oor Eswatini, wat volgens Maiwashe die span gehelp het om hul kombinasies te verfyn voor die verdediging van hul titel.
Comments