OGGEND SPORT: Van den Berg skitter in Baltimore, die Proteas behaal ‘n skoonlopie in Namibië en, Rybakina en Zverev is as die Amerikaanse Ope-kampioene gekroon
In rugby-nuus: Morné van den Berg het sy plek in die Springbok-aanvangspan ten volle benut deur in hul 43-28-oorwinning oor die All Blacks in Baltimore te skitter en as speler van die wedstryd aangewys te word.
Die 28-jarige skrumskakel het ’n drie gedruk, die bal vinnig versprei, sterk verdedig en selfs ’n stelskoppoging geslaag.
‘n Emosionele Van den Berg sê sy drie was besonder spesiaal omdat hy as jong seun daarvan gedroom het om sulke oomblikke te beleef nadat hy drieë in sy ouerhuis se tuin gedruk het.
LUISTER HIER:
# In krieket-nuus: Die Proteas het ‘n oorwinning van 3-0 in die internasionale eendagreeks teen Namibië beklink met nege paaltjies in Windhoek, waartydens hulle die teiken van 156 lopies in net meer as 21 boulbeurte bereik het.
Jordan Hermann het sy indrukwekkende internasionale begin voortgesit met 77 lopies van 59 balle, terwyl Connor Esterhuizen onoorwonne op 68 geëindig het, voordat Dewald Brevis die oorwinning met ‘n ses beklink het.
Vroeër het die waarnemende kaptein, Bjorn Fortuin, sy beste syfers nog van 4-33 behaal en Nqabayomzi Peter het twee paaltjies geneem. Hermann het die reeks as Suid-Afrika se voorste lopiemaker met 247 lopies afgesluit.
En, in tennis-nuus: Duitsland se Alexander Zverev het die Amerikaner Ben Shelton met 6-3, 7-6, 5-7, 6-2 geklop om sy tweede Grand Slam-titel te verower, en die herinneringe aan sy pynlike nederlaag in vyf stelle tydens die 2020-Amerikaanse Ope-eindstryd uit te wis.
Shelton het gehoop om die eerste Amerikaanse man in 23 jaar te word wat ‘n Grand Slam wen ná indrukwekkende oorwinnings oor Carlos Alcaraz en Frances Tiafoe, maar Zverev se veelsydige spel en kalmte het in New York die deurslag gegee.
Elena Rybakina het haar opgang na die wêreldnommer-een-posisie bekroon deur die Amerikaanse Ope-titel vir vroue te wen, om nog ‘n Grand Slam-titel by haar oorwinnings by Wimbledon en die Australiese Ope te voeg, terwyl sy haar kenmerkende kalmte op die baan behou het.
Comments