Omstrede oud-Bloemfonteinse vroedvrou pleit onskuldig

Die omstrede oud-Bloemfonteinse vroedvrou, Yolande Maritz-Fouchee, het skuld ontken op 14 aanklagte teen haar. Volgens Netwerk24 word sy aangekla van bedrog, aangranding op vier moeders en hul babas, asook dat sy ‘n ongekwalifiseerde persoon aangestel het om haar tydens geboortes by te staan. ‘n Aanklag van strafbare manslag is ook by die finale akte van beskuldiging gevoeg. Die staat voer aan dat sy, as alleen-eienaar van die tuisgeboortesentrum, verantwoordelik was om die klaers te ondersteun en om te verseker dat hulle in optimale gesondheid tydens hul swangerskap, kraam en nageboortesorg was. Maroela Media het vroeër berig dat Fouchee daarvan beskuldig word dat sy vir die dood of gestremdheid van verskeie babas verantwoordelik is.