Onderwysdepartement word beskuldig van onregverdige rassisme-aanklag

Die Gautengse Onderwysdepartement het die skoolhoof en adjunkhoof van ‘n Pretoriase Hoërskool vir Meisies geskors vir beweerde rassistiese uitsprake en boeliegedrag in ‘n geselskamer. Die Thabo Mbeki-stigting het kritiek uitgespreek oor hoe die bewerings hanteer is. Volgens The Citizen het die stigting al die bewyse noukeurig deurgegaan en niks van die aantygings opgespoor nie. Hulle het wel bevind dat dit wil voorkom asof die departement vasbeslote was om die skool met die aanklag van rassisme te besmeer. Die Gautengse onderwysdepartement se woordvoerder, Steve Mabona, wou nie kommentaar lewer nie. Die stigting het voorgestel dat die hoof en adjunkhoof wat geskors is, na hul poste terugkeer en beklemtoon dat straf nie altyd die beste reaksie is nie, veral wanneer dit gaan oor rasverskille in skole.