Oorlogskamers word beplan om werkloosheid en armoede te takel

Die instelling van sogenaamde oorlogskamers kan dalk help om klein besighede vinniger betaal te kry en sodoende werksgeleenthede te beskerm. Adjunkpresident Paul Mashatile het by ’n rondetafelbespreking in Pretoria voorgestel dat die regering drie sulke kamers oorweeg: een vir die ekonomie en werkgeleenthede, een vir armoede en honger, en een vir skoon regering. Volgens Mashatile sal die kamers fokus op betalingsiklusse van 10 tot 15 dae en aankope wat transformasie bevorder. Hy sê departementshoofde en politieke leiers se prestasie moet gemeet word aan hoe vinnig rekeninge betaal word. Die regering is volgens hom daartoe verbind om klein besighede te ondersteun as deel van armoedeverligting.