Operasie Vala uMgodi bekamp onwettige mynbou in Vrystaat

Die Operasie Vala uMgodi-span laat steeds ’n blywende impak in die Vrystaat. Die span het verskeie operasionele strategieë uitgevoer om misdaad wat met onwettige mynbou verband hou, te bekamp. Volgens ’n polisieverklaring het gevegs- en proaktiewe operateurs, saam met hommeltuigvlieëniers, verskeie patrollies uitgevoer. Hulle het te voet, per voertuig en uit die lug gebiede gemonitor. Ses mans is betrap terwyl hulle onwettige mynbou bedryf het. Die polisie het oor die 100kg goudhoudende materiaal en goudverwerkingsgereedskap, soos grawe, spitvurkies, pikke en sifdraad, gekonfiskeer. Sake is by polisiekantore in Welkom, Theunissen en Allanridge geopen. Die verdagtes sal binnekort in die hof verskyn.