Opknappings by Naln begin

Herstelwerk het begin aan die gebou wat die Nasionale Afrikaanse Letterkundige Museum en Navorsingsentrum (Naln) in Bloemfontein huisves.

Nova News berig die kontrak behels sowat R990 000 se opknappingswerk, hoofsaaklik aan die sinkdakgedeeltes van die gebou.

Volgens kontrakteur Nico Killian word die ou dakplate, fassies en geute vervang, terwyl ernstige lekkasies ook aangespreek word.

Nuwe dakmateriaal word na verwagting op 9 April afgelewer en die werk behoort binne twee weke voltooi te wees.

Die projek word bestuur deur ’n plaaslike argitek en is deur die Vrystaatse Departement van Sport, Kuns en Kultuur aangestel.

Die historiese gebou, wat meer as ’n eeu oud is, huisves belangrike navorsing en dokumente van die Afrikaanse en Sotho tale.

Verdere planne sluit die installasie van dompelpompe om die kelder en waardevolle materiaal teen water te beskerm in.

Recent Posts