Outa verwelkom inhegtenisneming van voormalige Transnet-bestuurders

Die Organisasie Teen Belastingmisbruik (Outa) verwelkom die inhegtenisneming van voormalige Transnet-bestuurders wat van bedrog, korrupsie en geldwassery aangekla word.

Brian Molefe, Siyabonga Gama, Anoj Singh en Thamsanqa Jiyane het gister in die Palm Ridge-landdroshof in Gauteng verskyn en is borg toegestaan.

Die aanklagte hou verband met ‘n beweerde onreëlmatige betaling aan ‘n Gupta-gekoppelde maatskappy in 2015.

Hulle word daarvan beskuldig dat hulle ‘n onreëlmatige betaling aan Trillian Asset Management gemaak het vir ‘n lening van 30-miljard rand om lokomotiewe in 2012 te koop.

Outa se Rudie Heyneke sê hierdie sake word al jare lank gerapporteer en is tydens die Staatskapingskommissie uitgelig.