Outa vra groter aanspreeklikheid by munisipaliteite

Die Organisasie teen Belastingmisbruik, Outa, sê Suid-Afrika se munisipaliteite het nie 'n tekort aan planne om dienslewering te verbeter nie, maar wel 'n tekort aan aanspreeklikheid.

Maroela Media berig die organisasie het sy finale kommentaar op die regering se hersiene konsepwitskrif oor plaaslike regering ingedien.

Volgens Outa kan probleme soos water- en kragonderbrekings, vervalle infrastruktuur, rekeninggeskille en stygende tariewe dikwels herlei word na swak leierskap, politieke inmenging en onvoldoende toesig.

Outa se uitvoerende bestuurder, Julius Kleynhans, sê inwoners is moeg daarvoor om meer te betaal terwyl munisipale dienste agteruitgaan.

Die organisasie stel onder meer voor dat strengere bevoegdheidsvereistes vir raadslede en politieke ampsdraers ingestel word en dat sterker optrede teen wanbestuur en korrupsie geneem word.

Ter illustrasie. FOTO: Maroela Media