Phala Phala: 'Ramaphosa is gereed om die verslag te beveg'

Saamgestel deur Ilde Roos
Jun 5
1 min read

President Cyril Ramaphosa is gereed om sy poging te verdedig om die onafhanklike Artikel 89-paneel se verslag oor die Phala Phala-saak tersyde te laat stel.

Eyewitness News berig die Wes-Kaapse Hooggeregshof sal sy aansoek van 2 tot 4 September aanhoor.

Die hofuitdaging volg nadat die parlement, ná ’n uitspraak van die Konstitusionele Hof, ’n vervolgingskomitee vir moontlike afsetting ingestel het. Ramaphosa voer aan dat die onafhanklike paneel se proses gebrekkig was en nie die wettigheid en toelaatbaarheid van die bewyse behoorlik beoordeel het nie. Hy betwis ook die paneel se bevinding dat die bewerings moontlik afsetbare oortredings kan uitmaak.

Die presidensiële woordvoerder, Vincent Magwenya, sê Ramaphosa wil hê die saak moet bespoedig en afgehandel word. Magwenya sê Ramaphosa het reeds in die openbaar, op rekord, gesê dat hy nog altyd die Grondwet gerespekteer het en sal voortgaan om hom aan die voorskrifte daarvan te onderwerp en na te kom.