Planne moet ná 'n jaar sonder beurtkrag steeds gemaak word

Saamgestel deur Ilde Roos
May 13
1 min read

Die land vier vandeesweek 365 dae sonder beurtkrag. Die minister van elektrisiteit en energie, Kgosientsho Ramokgopa, sê dat hoewel dit nie ’n rede vir viering behoort te wees nie, dit wel ’n belangrike mylpaal is om te besin oor die pad wat die land afgelê het na ’n stabiele elektrisiteitsvoorsiening.

EWN berig Ramokgopa het Dinsdag tydens die departement se begrotingsrede in die Parlement belowe dat al die provinsies teen Maart 2027 ook beurtvermindering sal oorkom, wat veroorsaak word deur vraag wat munisipale voorsiening en infrastruktuurbeperkings oorskry.

Ramokgopa het gesê dat terwyl die land werk aan die diversifisering van sy energievoorsiening, kernenergie met groter ywer nagestreef sal word. Dit sluit in die herlewing van die land se sogenaamde "pebble-bed" modulêre reaktortegnologie, wat vir verskeie jare buite werking was.

Die minister sê ’n geïntegreerde, nasionale 20-jaar-vooruitsig vir die uitfasering, heraandrywing en herbestemming van steenkoolkragstasies sal ook ontwikkel word. Die plan sal minimale emissiestandaarde, nakoming, kosteverhaling en gemeenskapsherlewing insluit.