Plunderaars slaan ná ‘n vragmotorongeluk toe

Saamgestel deur Nadia Pieters

Jul 13

1 min read

Plunderaars het glo 'n vragmotor se vrag gesteel nadat die voertuig op die N1 sowat 30 kilometer buite Bloemfontein in die rigting van Johannesburg omgeslaan het.

Volgens SA Trucker was die beseerde bestuurder steeds op die toneel toe mense glo die vraghouer oopgebreek en goedere in voertuie gelaai het.

Die oorsaak van die ongeluk is nog onbekend en die bestuurder se toestand is nog nie bevestig nie.

Volgens SA Trucker is dit die jongste in 'n reeks voorvalle waar plunderaars ongelukstonele teiken eerder as om hulp aan beseerde motoriste te verleen.

Dit is ook nog nie bekend of iemand in verband met die beweerde plundering in hegtenis geneem is nie.