Pogings om onwettige sigarette- en tabakhandel te bekamp word verskerp

Die Suid-Afrikaanse Inkomstediens sê hulle het die afgelope ses maande beduidende vordering gemaak in hul pogings om onwettige tabak- en sigarettehandel te bekamp. Die inkomstediens het op onwettige sigarette ter waarde van R13.5 miljoen en onwettige tabak ter waarde van R1.3 miljoen beslag gelê. Hulle het die onwettige sigarette by toegangspunte onderskep en gekonfiskeer tydens gesamentlike operasies met wetstoepassingsagentskappe. Die inkomstediens waarsku egter dat die onwettige sigarette- en tabakhandel steeds toeneem en die land jaarliks meer as R20 miljard aan belastinginkomsteverliese kos.