Rampbestuurspanne is na die suidkus gestuur weens skade by vakansiebestemmings

Die KwaZulu-Natalse departement van Samewerkende Regering sê rampbestuurspanne is na die provinsie se suidkus gestuur ná oorstromings wat infrastruktuur by verskeie gewilde vakansiebestemmings beskadig het.

SABC-nuus berig swaar reën het Sondag langs die kus van Margate tot by Port Sheptsone voorgekom.

Kitsvloede het skade aan padinfrastruktuur, kommersiële eiendomme en winkelsentrums, insluitend die Shelly Beach-sentrum aangerig.

'n Woordvoerder, Senzelwe Mzila, sê verskeie paaie word versper deur bome wat omgeval het en sinkgate het gevorm, veral in die Manaba-gebied. Hy sê geen ongevalle is aangemeld nie en nooddienswerkers is besig met opruimingswerk en formele skadeberamings.

Lede van die publiek word aangeraai om laagliggende paaie en oorstroomde brûe te vermy, sowel as gebiede waar sinkgate aangemeld is.

Ter illustrasie. FOTO: Pexels