Reisigers is oor veiligheidsrisiko’s in SA gewaarsku

Saamgestel deur Nadia Pieters
Mar 30
1 min read

Updated: Mar 31

Internasionale toeriste wat Suid-Afrika wil besoek word aangeraai om uiters versigtig te wees te midde van veiligheids- en bedrogskwessies.

Volgens IOL het verskeie lande, waaronder die Verenigde State, die Verenigde Koninkryk, Kanada en Australië, hul reisadvies opgedateer. Die Verenigde State hou Suid-Afrika op ’n vlak 2-waarskuwing, wat verhoogde waaksaamheid aanbeveel weens risiko’s soos misdaad, onrus en ontvoering.

Gewelddadige misdaad, insluitend gewapende rooftogte, kapings en huisinbrake, bly ’n groot bekommernis. Daar word ook gewaarsku teen sogenaamde “smash-and-grab”-aanvalle, veral in stedelike gebiede. Ontvoering van buitelanders vir losprys is nóg ’n risiko wat uitgelig word.

Benewens fisieke veiligheid, word toeriste ook gemaan om op hul hoede te wees vir kubermisdaad en aanlyn bedrog.