SANW-soldate oorlede na hul vragmotor omslaan

Twee soldate van die Suid-Afrikaanse Nasionale Weermag (SANW) is oorlede na hul vragmotor op die R31-pad tussen Koopmansfontein en Delportshoop omgeslaan het. SABC News berig die vragmotor het met 19 SANW-lede van die Lohatla-weermagbasis gery. Volgens die polisie is 17 ander soldate in die hospitaal opgeneem. Polisiewoordvoerder, Sergio Kock, sê hulle ondersoek 'n saak van strafbare manslag na dié ongeluk. Die SANW-vragmotor het in reënerige weerstoestande van Lohatla na Kimberley gery toe die ongeluk plaasgevind het. Die oorsaak van die ongeluk vorm deel van die polisieondersoek.