Skooladministrateur steel R1-miljoen, gee homself oor

'n Man van Rustenburg is R5 000 borg toegestaan nadat hy hom vrywillig aan die polisie oorgegee het ná die diefstal van meer as R1-miljoen van 'n laerskool. The Citizen berig Ofentse Solomon Molemane was 'n administratiewe assistent by die Noordwes Onderwysdepartement, en het as finansiële beampte en tekenbevoegde vir die Laerskool Sunrise View opgetree. Tussen Januarie 2019 en Maart 2020 het hy geld vanaf die skool se rekening na sy eie en sy vriendin se rekeninge oorbetaal, wat nie aan die skool gekoppel was nie. In totaal is meer as R1-miljoen onttrek. Molemane verskyn op 175 klagte van bedrog of, alternatiewelik, diefstal, en moet hom twee keer per week by die Mogwase-kantoor aanmeld. Terwyl die vriendin nog in hegtenis geneem moet word, is die saak tot 14 November uitgestel.