Slegte weer kan kragtoevoer in dele van die Vrystaat ontwrig

Eskom waarsku dat erge donderstorms Vrydag en Saterdag tot kragonderbrekings in dele van die Vrystaat kan lei.

Volgens ‘n mediaverklaring het slegte weer reeds kragtoevoer in verskeie dele van die provinsie geraak, met talle kraglyne wat beskadig is.

Die Melkspruit-Rouxville-kraglyn is vroeg vanoggend weens ernstige skade aan ’n houtpaalstruktuur afgeskakel. Dit het daartoe gelei dat Rouxville, Smithfield en Zastron sonder krag is. ’n Hersteltyd is nog nie bekend nie.

Hobhouse word ook deur ’n kragonderbreking geraak.

Eskom sê sy tegniese spanne werk om kragtoevoer so gou moontlik te herstel, maar herstelwerk kan net gedoen word wanneer dit veilig is.

FOTO: Verskaf