Standard & Poor’s hou SA se skuldgradering onveranderd

Die regering sê hy neem kennis van Standard & Poor’s se besluit om Suid-Afrika se buitelandse en plaaslike skuldgraderings onveranderd te laat. Volgens SAnews hou die graderings steeds ’n positiewe vooruitsig in. Volgens die agentskap trek Suid-Afrika voordeel uit ’n sterk finansiële stelsel en stabiele instellings. Standard & Poor’s sê daar is egter steeds kommer oor lae ekonomiese groei, hoë staatskuld en fiskale tekorte. Die Nasionale Tesourie sê die regering sal voortgaan met ekonomiese hervormings en infrastruktuurbelegging om groei aan te moedig. Die fokus bly op fiskale stabiliteit, die verligting van lewenskoste en ondersteuning aan kwesbare huishoudings. Die regering verwelkom die agentskap se erkenning van Suid-Afrika se pogings om sy fiskale posisie volhoubaar te bestuur.