Studentebetogings in Bfn lei tot uitgestelde eksamens

Studentebetogings by die Sentrale Universiteit vir Tegnologie (SUT) se Bloemfontein-kampus het daartoe gelei dat die eksamens wat Maandag afgelê sou word, nou uitgestel is.

Alle toetse en assesserings wat vir Donderdag 14 Mei en Vrydag 15 Mei geskeduleer was, sal ook na volgende week geskuif word aangesien studente dit weens die voortgesette protesoptrede nie kon aflê nie.

Netwerk24 berig alle dekane het die reëlings bevestig, en fakulteite sal studente oor die hersiene roosters inlig. Die eksamens wat Maandag geskryf sou word, word uitgestel na ’n nuwe datum wat mettertyd bekend gemaak sal word.

Die SUT het Donderdag ’n memorandum ontvang het met eise wat verband hou met “dringende” kwessies wat studente akademies, finansieel en maatskaplik raak. Dit sluit onder meer in toegang tot eksamens wat geraak is deur stelsel- en/of fakulteitsfoute, asook uitstaande toelaes aan verskaffers vir verblyf.

Rosestad-nuus het vroeër berig die SUT sê hy respekteer die reg tot vreedsame protes, maar bly verbind tot die veiligheid van studente, personeel en besoekers.

Betogings by die SUT. FOTO: Verskaf