Suid-Afrikaners tuis na Mianmar redding

Die Departement van Internasionale Betrekkinge en Samewerking (DIRCO) het 23 Suid-Afrikaners wat teen hul wil in Mianmar aangehou is in ’n beweerde mensehandel-saak, na Suid-Afrika teruggebring. DIRCO se mediaverklaring sê dat die Suid-Afrikaners Donderdag op eie bodem geland het. Hulle was glo deel van 7 000 mense wat na Thailand gelok is deur ’n beweerde werwingsagentskap wat werk op sosiale media belowe het. Hierdie advertensies het goeie salaris, gratis akkommodasie, reisgelde en ander voordele belowe. Nadat hulle in Thailand was, is hulle teen hul wil na Mianmar vervoer. Die smokkelaars het ’n losprys van R50 000 gevra.