Theuns Jordaan word in Amsterdam met 'n konsert vereer

Ná die oorweldigende sukses van die Theuns Jordaan Tribute-konserte in Suid-Afrika, wat skares van meer as 15 000 mense gelok het, gaan die produksie nou oorsee.

Volgens Novus Media sal die room van Suid-Afrika se musikale talent byeenkom om hulde te bring aan die legendariese Theuns Jordaan. Die sterrebesetting sluit in onder andere Steve Hofmeyr, Kurt Darren, Bobby van Jaarsveld, Karlien van Jaarsveld, en vele meer.

Die konsert sal in Amsterdam gehou word.

Jacques du Plessis, wat self 15 jaar saam met Jordaan opgetree het, sê almal is in verwondering en ontsag vir die invloed wat Jordaan op soveel miljoene mense gehad het. Sy nalatenskap is omvangryk.

Die Theuns Jordaan Tribute in Amsterdam belowe om ’n besonderse eenmalige massa-konsert te wees.

Met hierdie internasionale uitbreiding van die tribute-reeks bereik Jordaan se nalatenskap nou ook die Suid-Afrikaanse gemeenskap in Europa, wat ’n bewys is van sy blywende invloed op die harte van mense regoor die wêreld.