Tientalle verdagtes is vir verskeie misdade in die VS in hegtenis geneem

Saamgestel deur Ilde Roos
3 hours ago
2 min read

'n Totaal van 38 verdagtes is die afgelope week deur polisie van die Thabo Mofutsanyana Distrik vir kontak- en eiendomsverwante misdade in hegtenis geneem.

Adjudant-offisier Mmako Mophiring sê in 'n polisieverklaring die distrik het ’n toename in ernstige en gewelddadige misdade ervaar, insluitend moorde, poging tot moord en verkragtingsake, veral in die gebiede Maluti-a-Phofung, Phumelela en Dihlabeng.

'n Vrou in Warden is na bewering vermoor en in 'n straat aangetref.
In Qwaqwa is ’n vrou wat ernstig aangerand is, later in die hospitaal aan haar beserings oorlede.
In Phuthaditjhaba is ’n vrou na bewering deur haar man vermoor, waarna hy homself aan die polisie oorgegee het.
Ander aangemelde voorvalle sluit in die moord op ’n voorman op ’n plaas buite Bethlehem, asook ’n hawelose man wat na bewering in die straat doodgeskiet is. In laasgenoemde geval is ’n verdagte in hegtenis geneem en ’n vuurwapen gekonfiskeer.
Die polisie het ook verskeie vuurwapenverwante voorvalle hanteer waar slagoffers geskiet en beseer is tydens rusies, insluitend geskille naby kroeë oor parkering. Minstens vier vuurwapens is gedurende die afgelope sewe dae gekonfiskeer.
Wat seksuele oortredings aanbetref, is 14 verdagtes opgespoor en in hegtenis geneem. Hierdie sake behels bewerings van verkragting en seksuele aanranding, met slagoffers wat wissel van minderjariges tot volwassenes.
In Fouriesburg is ’n vrou met die hulp van die plaaslike Gemeenskapspolisiëringsforum vir die beweerde verkragting van ’n jong man in hegtenis geneem.
Daarbenewens is 14 verdagtes in hegtenis geneem vir polisie-aksie misdade wat verband hou met die besit van vermoedelik gesteelde eiendom. Items wat teruggevind is, sluit in vee (skape), elektriese toestelle, verf, koperpype, klere en sinkplate.