Tiger Brands gebruik nou sonkrag

Saamgestel deur Ilde Roos
Jun 11
1 min read

Tiger Brands gebruik nou sonkragstelsels by sewe van sy vervaardigingsaanlegte reg oor Suid-Afrika – insluitend die Vrystaat. Ander aanlegte is in Gauteng, Noordwes en KwaZulu-Natal geleë en lewer reeds energie wat direk vir vervaardigingsprosesse gebruik word.

Maroela Media berig die maatskappy sê die sonkragprojekte vorm deel van ŉ belegging om die gebruik van volhoubare energie-oplossings uit te brei, die afhanklikheid van konvensionele elektrisiteit en sy koolstofvoetspoor te verminder.

Tiger Brands het hom daartoe verbind om teen 2030 sowat 31% van sy elektrisiteitsbehoeftes uit hernubare energiebronne te verkry. Die maatskappy streef ook daarna om sy koolstofvrystellings met 30% te verminder en energiedoeltreffendheid met dieselfde persentasie te verbeter.