Toe Zille swem, spring die burgemeester om 'n slaggat te herstel

Die Stad van Johannesburg het ’n groot slaggat in Douglasdale herstel wat drie jaar lank geïgnoreer is. Dit volg nadat ’n video opgeduik het van Helen Zille, die DA se burgemeesterkandidaat in Johannesburg, wat daarin swem.

Zille word in snorkeltoerusting gesien diep binne-in die watergevulde gat wat oor die helfte van die pad strek.

EWN berig burgemeester Dada Morero het gesê die gat is veroorsaak deur ’n gebarste staalpyp wat jare lank nie herstel is nie. In die video beweer Zille daar is ’n modus operandi waarom die slaggat nie reggemaak is nie. Sy sê amptenare wat probeer het om die slaggat reg te maak, kom snags sodat hulle oortyd kan eis, en dan word dit weer verniel en benodig meer geld vir herstelwerk.

Die video het ’n vinnige reaksie van Morero ontlok, wat die terrein besoek en herstelwerk geïnisieer het. Die Johannesburg Road Agency sê die pad sal met teer weer gelap word.

Helen Zille swem in 'n slaggat. SKERMGREEP: Threads