Trump wil nie sy verhouding met Musk herstel nie

Die Amerikaanse president, Donald Trump, sê hy het geen begeerte om sy verhouding met die miljardêr, Elon Musk, te herstel nie. In ’n onderhoud met NBC het Trump gewaarsku teen ernstige gevolge indien Musk voortgaan om Demokrate te befonds. Hy beskuldig Musk van oneerbiedigheid teenoor die Kantoor van die President. Trump se uitlatings volg ná ’n week van openbare vetes tussen die twee, waarin Musk op X aangedui het dat Trump glo in die Epstein-dokumente genoem word. Die sogenaamde Epstein-dokumente hou verband met die veroordeelde seksoortreder, Jeffrey Epstein, en bevat glo sensitiewe inligting oor verskeie prominente figure.