Twee mense is in Bfn vas vir die onwettige besit van vuurwapens en ammunisie

’n Man en sy meisie, wat glo in besit van ’n beduidende voorraad ongelisensieerde vuurwapens en ammunisie was, is in Batho in hegtenis geneem.

’n Polisiewoordvoerder, sersant Mahlomola Kareli, sê met die aankoms van polisiebeamptes by 'n huis in Batho is hulle toegang tot die perseel verleen. ’n Groot kluis is opgemerk, maar dit was leeg. Volgens Kareli het verdere soektogte gelei tot die ontdekking van 23 boksies ammunisie van verskillende kalibers, versteek naby ’n kombuiskassie, en vier gewere wat onder ’n matras in die slaapkamer versteek was.

Altesaam 1 163 patrone en vier gewere, insluitend ’n windbuks, is in die operasie gekonfiskeer. Die verdagtes is onmiddellik weens die onwettige besit van vuurwapens en die onwettige besit van ammunisie aangekeer.

Kareli sê ballistiese toetse sal op die vuurwapens en ammunisie gedoen word om te bepaal of dit gebruik is in die pleeg van enige misdaad. Die kluis is ook gekonfiskeer.

Die twee sal na verwagting binnekort in die landdroshof in Bloemfontein verskyn.

Ter illustrasie. FOTO: The Cable