Vermeende dwelmsmous van Bloemfontein is vasgetrek

’n Vermeende dwelmsmous is buite Bloemfontein in hegtenis geneem nadat die polisie hom met byna 3 000 Mandrax-tablette betrap het. Luidens ’n polisieverklaring het ’n verdagte wat reeds aan hulle bekend is, op Dinsdag met sy bakkie op die R30-pad verby lede van die Openbare Orde-polisie gery. Die polisiehond-eenheid het die voertuig by die R30-Glen-kruising afgetrek. Tydens ’n deeglike ondersoek het hulle drie plastieksakke vol Mandrax-tablette agter ’n luidsprekerboks gevind. Die dwelms het ’n beraamde straatwaarde van meer as R148 000. Die man is onmiddellik in hegtenis geneem en sal na verwagting, op Vrydag 16 Mei, in die Bloemfonteinse landdroshof verskyn op ’n aanklag van dwelmhandel.