Vermeende Vrystaatse reeksverkragter se saak is uitgestel

Die vermeende reeksverkragter en gemeenskap teisteraar in die Vrystaat, Thato Sharack Leeto, se saak is uitgestel tot 30 April 2025 vir verdere ondersoek. Luidens ’n polisieverklaring word Leeto glo verbind met 'n reeks verkragtings en inbrake wat die gemeenskappe van Virginia, Meloding en Makwane vir verskeie jare geteister het. Hy staan nou tereg op verskeie aanklagte, insluitend agt aanklagte van verkragting, na 'n uitgebreide ondersoek. In 2023 het ’n forensiese ondersoek sy betrokkenheid by sake in Makwane en Qwaqwa bevestig. Hy is voorheen in Virginia, Welkom en Excelsior vir huisbrake in hegtenis geneem.