Vervalste bankstate kan glo aanlyn gekoop word

Saamgestel deur Nadia Pieters
11 hours ago
1 min read

Vervalste betaalstrokies en bankstate kan glo aanlyn vir so min as R400 gekoop word – maar dié “kortpad” kan jou finansiële toekoms vir jare ontspoor.

MyBroadband berig kenners waarsku dat banke deesdae gevorderde tegnologie gebruik om vervalste dokumente binne sekondes uit te wys, onder meer deur QR-kodes, unieke identifiseerders en data-ontleding.

Sou bedrog vermoed word, kan dit nie net tot strafregtelike klagtes lei nie, maar ook tot ’n negatiewe notering by die Southern African Fraud Prevention Service (SAFPS) wat tot tien jaar kan duur.

Volgens Phoenix Bonds se nasionale direkteur, Hannah van Deventer, is só ’n notering byna onmoontlik om van te herstel en kan dit selfs werkgeleenthede beïnvloed.

Sy waarsku dat mense dink hulle koop ’n beter kans op ’n huislening, maar hulself eintlik blootstel aan ’n kriminele rekord en ernstige finansiële skade.

Kenners sê daar is steeds wettige, gestruktureerde maniere om vir finansiering te kwalifiseer.