Vloedwaarskuwing vir Maselspoort

Die Mangaung Metro Munisipaliteit (MMM) het ’n waarskuwing uitgereik oor die Modderrivier wat oorstroom weens die baie reën wat onlangs in die gebied geval het. Hulle het ook die nuutste inligting oor die Welbedachtdam - waarvan die watertoevoer tydelik onderbreek was - deurgegee. Die Maselspoortdam het ’n oorvloei van 450 mm oor die damwal. Grondeienaars langs die rivier word gewaarsku om hul besittings te verskuif. Die gebiede wat geraak word sluit in die Maselspoort-oord, Sandrivier-oord, plase by Glen en ook plase langs die Modderrivier. Intussen word water vanaf die Welbedachtdam na Brandkop gepomp teen ’n lae druk, en watertoevoer word geleidelik herstel. Gebiede wat moontlik nog geraak word, sluit in Vista Park en die industriële gebied van Hamilton.