Vonke spat tussen Malema en ‘n ANC-LP

Saamgestel deur Ilde Roos
6 days ago
1 min read

Vonke het gespat tydens 'n sitting van die afsettingskomitee toe ’n woordewisseling tussen EFF-leier Julius Malema en die ANC-LP Cameron Dugmore in naamskellery en beskuldigings van rassisme ontaard het.

News24 berig Malema het Dugmore daarvan beskuldig dat hy ’n rassis en wit oppergesagsdenker is nadat Dugmore beswaar gemaak het daarteen dat Malema die Minister in die Presidensie, Khumbudzo Ntshavheni, op haar voornaam aanspreek.

Dugmore het aangevoer dat dit onparlementêr en disrespekvol is.

Toe Dugmore die komiteevoorsitter, Makashule Gana, daaroor toespreek, het Malema hom onderbreek en gesê hy het geen respek vir wit oppergesagsdenkers nie.

Gana het Malema beveel om sy woorde terug te trek, maar Malema het voortgegaan gesê hy kan nie aan "hierdie nar" onderwerp word nie.

Malema het daarna wel sy woorde teruggetrek, maar op sy beurt geëis dat Dugmore sy woorde terugtrek. Gana het dit teengestaan.

Malema sê hy trek die woord "rassis" terug, maar handhaaf dat Dugmore ’n wit oppergesagsdenker is.

Dugmore het ’n lang geskiedenis in die stryd teen apartheid.