Voormalige Bloemfonteinse landdros is skuldig aan regsverydeling

’n Voormalige streeklanddros in Bloemfontein, Leavit Mkansi, is skuldig bevind aan regsverydeling nadat hy gereeld privaat met ’n beskuldigde in sy hof gekommunikeer het. The Citizen berig dat Mkansi meer as 190 keer telefonies met die berugte Stanley Bakili, wat van bedrog aangekla is, gekommunikeer het. Bakili is in 2013 in hegtenis geneem op byna 30 aanklagte van bedrog en het voor verskeie landdroste verskyn voordat sy verhoor in Februarie 2017 voor Mkansi begin het. Bewyse van Bloemfontein Windmill Casino dui glo aan dat hulle gereeld saam daar was. Mkansi is vroeër die week beboet met R120 000 of vyf jaar tronkstraf, terwyl Bakili ’n boete van R60 000 of 30 maande tronkstraf gekry het. Hofstukke toon dat Mkansi aanvanklik sy betrokkenheid ontken het, maar ondersoeke het sy misleiding blootgelê. Hy is al in 2020 geskors en kan nou nog verdere klagte in die gesig staar.