Vrese oor ‘n reeksmoordenaar neem toe

Vrese oor 'n reeksmoordenaar neem toe in Pretoria nadat die vierde verbrande liggaam van 'n vrou naby die Waltloo-treinstasie ontdek is. The Citizen berig 'n totaal van vyf vroue is sedert Junie in die ooste van Pretoria vermoor gevind – vier onherkenbaar verbrand langs 'n spoorlyn, en een gedeeltelik begrawe in 'n veld. Volgens polisiewoordvoerder Brigadier Brenda Muridili is niemand nog in hegtenis geneem nie, maar die taakspan wat saamgestel is om die moorde te ondersoek, werk deurentyd op soek na moontlike leidrade. Die polisie sluit nie die moontlikheid van 'n reeksmoordenaar uit nie. Muridili het bevestig dat forensiese kundiges deel is van die taakspan wat werk om te bepaal of die sake verband hou.