Vroue-polisie lei 'n suksesvolle misdaadveldtog in Bloemfontein

'n Operasie teen misdaad in Bloemfontein, wat deur 'n span vroue-polisielede gelei is, het tot verskeie inhegtenisnemings gelei.

Operation Basadi, tesame met beamptes van die Free State Gambling, Liquor and Tourism Authority (FSGLTA), het brandpunte in die stad geteiken vir die nie-nakoming van alkohol-regulasies en lisensiëring. Vier ongeregistreerde shebeens in die stad is gesluit.

Nova News berig ses verdagtes is in hegtenis geneem vir dwelmbesit, en twee vir die besit van onwettige goedere in Bayswater.

In Ella-straat in Willows is 12 mense in hegtenis geneem vir die besit van huisbraak-toerusting, gevaarlike wapens en items wat na 'n vuurwapen lyk.

Provinsiale polisiewoordvoerder, luitenant-kolonel Thabo Covane, sê padblokkades op die N8 en R702 is ook uitgevoer.