Vrystaat-bejaardes maak kinderharte warm

Vrystaat bejaardes is besig om ’n verskil in kinders se lewens te maak deur handgemaakte poppe as simbole van liefde en hoop te skenk.

Die sogenaamde Poppies vir liefde-projek fokus daarop om gebreide poppe aan kinders in jeugsorgsentrums en kinderhuise te oorhandig, as ’n herinnering dat hulle nie alleen is nie.

Volgens Nova News word die projek deur inwoners van die Jordaniapark-aftreeoord in Kroonstad gedryf, waar vroue saamwerk om iets betekenisvol vir kinders te skep.

Sowat 250 poppe is reeds met groot toewyding gebrei, met die eerste skenking wat vroeër die maand aan die Maokeng-sentrum vir kinders met gestremdhede oorhandig is.

Organiseerders sê die poppe is meer as net speelgoed, en dra ’n boodskap van omgee, ondersteuning en hoop.

FOTO: Nova News