Vrystaat-man word tot 15 jaar gevonnis vir verkragting

’n Man van die Vrystaat is tot 15 jaar tronkstraf gevonnis en op die Nasionale Register vir Seksuele Oortreders geplaas nadat hy sy buurvrou verkrag het. The Citizen berig die Bloemfonteinse Hof vir Seksuele Oortredings het die 42-jarige Sechaba Mohapi van Masike naby Bloemfontein skuldig bevind aan verkragting. Die 23-jarige slagoffer het na 'n winkel gestap toe Mohapi haar onder valse voorwendsels na sy erf geroep het. Toe sy by die deur wag, het hy haar die huis ingesleep, haar met ’n mes gedreig en haar verkrag. Die slagoffer het die voorval by die polisie aangemeld, wat tot Mohapi se inhegtenisname gelei het. Sy besonderhede is in die Seksuele Oortreders-register ingevoer.