Vrystaat-verkeersbeamptes gaan weermagopleiding ontvang

Die Verkeersdepartement van die Mangaung Metro Munisipaliteit en die Suid-Afrikaanse Nasionale Weermag het ’n vennootskap gevorm om wet en orde te bevorder. Volgens ’n plasing op die Vrystaat-regering se Facebook-blad sal die weermag opleiding aan verkeersbeamptes gee. Die weermag sal dissipline- en seremoniële opleiding verskaf om die personeel se doeltreffendheid en professionaliteit te verbeter. Raadslid Sibongile Tsoleli sê hulle waardeer die weermag se bereidwilligheid om hul kundigheid te deel. Die samewerking is gemik op ’n veiliger en meer funksionele munisipaliteit.