Vrystaatse polisie slaan toe op dwelms, kragkabels, verdagtes

Die polisie in die Vrystaat, wat vir Operasie Vala uMgodi ontplooi is, slaan steeds toe op dwelmbrandpunte in ’n poging om misdaad uit te roei. Die operasie het begin met besoeke aan brandpunte in Kutlwanong, naby Odendaalsrus. ’n Geïdentifiseerde teikenhuis is deursoek, waar 78 Mandrax-tablette en tik in ’n hondehok gevind is. Twee verdagtes is in hegtenis geneem, en ’n saak van handel in dwelms is by die Odendaalsrus-polisiestasie geopen. In Maokeng, Kroonstad, is ’n 43-jarige man met ’n gesteelde koperkabel in sy besit gearresteer. Die spanne het ook na Thabong, naby Welkom, teruggekeer, waar ’n 30-jarige man wat deur die hof gesoek is, in hegtenis geneem is. Alle verdagtes sal binnekort in die hof verskyn.