Vrystaters is vas nadat buitelandse burgers se spaza-winkels geplunder is

Die polisie in Harrismith in die Vrystaat het sewe verdagtes in hegtenis geneem ná die plundering van meer as 15 spaza-winkels naby Vrede. Dié spaza-winkels behoort glo aan buitelandse burgers. Twee staatsvoertuie is ook tydens die insident beskadig.

Volgens 'n polisieverklaring het 'n 16-jarige seun glo maagpyn gekry nadat hy kos by een van die winkels gekoop het. Hy het gemeenskapslede daarvan ingelig, wat die eienaar gekonfronteer het. Die eienaar het geweier om die winkel oop te maak, wat daartoe gelei het dat gemeenskapslede met geweld toegang verkry en kruideniersware uit die winkel geplunder het.

Nog gemeenskapslede het glo by die onrus aangesluit en daarna ander spaza-winkels in die gebied geplunder.

Tydens die onrus is twee polisievoertuie beskadig, met bande wat afgeblaas is en voorruite wat beskadig is. Lede van ’n private veiligheidsmaatskappy wat die polisie bygestaan het om die situasie te kalmeer, is ook aangeval.

Die verdagtes sal na verwagting binnekort in die Vrede-landdroshof verskyn.

Ter illustrasie. FOTO: Cape Chamber