Werksessies word gehou oor plaasveiligheid in die Vrystaat

As deel van pogings om veiligheid in die Vrystaat op te skerp, word veiligheidwerksessies elke Woensdag in elke distrik van die provinsie gehou.

By dié sessies vergader veiligheidsverteenwoordigers met lede van plaaswagte en veiligheidsgroeperings oor die stand van sake in elke distrik.

Veiligheidsrisiko-ontleder by Vrystaat Landbou (VL), Jane Buys, sê boere word aangemoedig om dit by te woon om hulself van gebeure en neigings in hul omgewings te vergewis.

Landbou.com berig Buys sê dit kom ná 'n toename in plaasaanvalle sedert Junie.

Rosestad-nuus het vroeër berig oor die mees onlangse voorval, waar 'n boer in die Heilbron-distrik aangeval is.

LEES MEER: 'n Boer oorleef 'n plaasaanval nadat aanvallers mis skiet

Buys waarsku voorts dat voertuigdiefstal op plase in die sentrale en oostelike dele van die Vrystaat toeneem, veral in dele soos Senekal en Bethlehem. Die vermoede bestaan dat dié diefstalle die werk van ’n sindikaat is en dat die voertuie na Gauteng geneem word.