Bellarmine Mugabe probeer glo die reg fnuik

Bellarmine Mugabe se regspan stel ’n pleitooreenkoms voor wat hom moontlik tronkstraf vir ernstige kriminele aanklagte kan laat vryspring.

News24 berig die seun van die voormalige Zimbabwiese president, Robert Mugabe, het aangebied om skuldig te pleit op immigrasie-aanklagte en deportasie te aanvaar in ’n omstrede poging wat kan veroorsaak dat hy ’n verhoor vir poging tot moord en ander ernstige misdade vermy.

Twee hooggeplaaste bronne het aan City Press gesê dat Mugabe se regspan die aanbod gemaak het tydens voortgesette onderhandelinge met die Nasionale Vervolgingsgesag (NVG), nadat aanklaers aangedui het dat hulle sy borgtogaansoek sal teenstaan weens sy onwettige immigrasiestatus.

Volgens bronne is daar tans twee voorstelle voor die vervolging. Die eerste behels dat Mugabe die beseerde slagoffer finansieel vergoed en ’n opgeskorte vonnis met deportasie aanvaar. Die tweede voorstel behels dat sy mede-beskuldigde skuldig pleit op die aanklagte van poging tot moord, besit van ’n ongelisensieerde vuurwapen en ammunisie, en verydeling van die gereg, met die Mugabe-familie wat finansiële vergoeding verskaf.

Mugabe staar verskeie aanklagte in die gesig na aanleiding van ’n voorval waarin 'n man glo in Februarie by ’n eiendom in Johannesburg geskiet en beseer is.

Bellarmine Mugabe tydens sy inhegtenisneming. FOTO: News24