Bestuurder by die arbeidsdepartement in Bloem is vir bedrog in hegtenis geneem

'n Kantoorbestuurder van die arbeidsdepartement in Bloemfontein, is Donderdag vir bedrog in hegtenis geneem. Polisiewoordvoerder, Brigadier Motantsi Makhele, sê in ‘n mediaverklaring dit volg na maande van noukeurige ondersoek na 'n gesofistikeerde bedrogspul. Die bedrogspul behels glo bedrieglike eise aan die Werkloosheidsversekeringsfonds. Daar word beweer dat die meesterbreine agter hierdie operasie niksvermoedende individue gewerf en hul persoonlike inligting gebruik het om fiktiewe maatskappye te registreer. Die maatskappye het dan glo vals eise by die Departement van Arbeid ingedien. Bedrieglik verkrygde fondse sou dan glo verdeel word tussen die werwer en in sommige gevalle die persoon wie se identiteit gebruik is. Soos beraam, kon die departement 'n verlies van meer as R1,5 miljoen gely het.