Die verspreiding van die nuwe grondslagfase-katalogus word gestaak
Die minister van basiese onderwys, Siviwe Gwarube, het besluit om die nuwe nasionale katalogus vir die grondslagfase op te skort.
Dit beteken die bestaande katalogus van voorheen goedgekeurde grondslagfase-leermateriaal sal steeds vir die 2027-skooljaar beskikbaar wees.
Die Papier berig Gwarube sê haar eerste verantwoordelikheid is om leerders te beskerm en te verseker dat skole gereed is vir die 2027-akademiese jaar. Sy sê sy sal nie toelaat dat onsekerheid rondom ’n verkrygingsproses tot onsekerheid in klaskamers lei nie.
Rosestad-nuus het vroeër berig die tender vir die katalogus is op omstrede wyse aan Lighthouse Publishers toegeken, wat slegs drie dae nadat die spesifikasies vir die tender uitgereik is, geregistreer is.
Hoewel die uitkoms van dié tenderskok nog nie bereik is nie, berig Die Papier dat die departement glo saam met provinsies en ander belanghebbendes werk om bestellings- en verspreidingstydlyne te beskerm.
Comments