Die Vrystaat se Ngwathe Munisipaliteit wil glo wéér appèl aanteken

Burgemeester Victoria de Beer-Mthombeni van die Vrystaatse Ngwathe Munisipaliteit het aangedui dat die munisipaliteit glo weer appèl wil aanteken teen ’n hofuitspraak oor provinsiale ingryping.

Maroela Media berig die Hooggeregshof in Bloemfontein het onlangs beveel dat die vorige hofbevel, wat provinsiale ingryping en die ontbinding van die munisipale raad vereis, onmiddellik geïmplementeer moet word.

AfriForum sê die voorgenome appèl sal die totaal van pogings om die hofbevel te betwis op minstens vyf te staan bring en beskuldig die munisipaliteit daarvan dat belastingbetalers se geld gebruik word terwyl basiese dienste faal.

Volgens die organisasie is tientalle water- en duisende kragonderbrekings glo oor ’n kort tydperk in Parys aangemeld.

Die hof het intussen gelas dat die provinsiale regering ’n herstelplan moet instel en gereeld verslag doen oor vordering.

FOTO: Maroela Media