Die Vrystaatse premier se aftrede word geëis

Saamgestel deur Nadia Pieters
Oct 3
1 min read

Die African National Congress Jeugliga in die Vrystaat doen 'n beroep op Premier Maqueen Letsoha-Mathae om saam met haar kabinet af te tree.

SABC News berig in 'n uitgelekde verklaring aan die media sê die Liga dat Letsoha-Mathae die jeug en die hele provinsie gefaal het, deur die beginsels van konsultasie en verantwoordbaarheid te vertrap.

Hulle beklemtoon dat die provinsie verval met munisipaliteite wat misluk in diensverskaffing. Die liga noem ook wydverspreide beweerde korrupsie, swak infrastruktuur en hoë werkloosheid.

Verder wil hulle ook hê dat die Vrystaatse ANC Provinsiale Uitvoerende Komitee ontbind of herkonfigureer word.

Dit volg nadat die Liga in Junie 'n optog na die Premier se kantoor gelei het om onder andere 'n provinsiale jeugekonomiese program te versoek.