Jeugdiges is vas nadat hulle 'n jong seun kaal uittrek en verfilm

Drie jong verdagtes is in hegtenis geneem nadat 'n video na vore gekom het waar hulle 'n 13-jarige seun by 'n rivier by Bohlokong naby Bethlehem in die Vrystaat kaal uitgetrek het.

Die insident het in Oktober 2023 gebeur, maar is nie tot 13 Maart 2026 gerapporteer nie, toe gemeenskapslede die kind se ma daarvan in kennis gestel het toe die video op sosiale media begin sirkuleer het.

'n Polisiewoordvoerder, adjudant-offissier Mmako Mophiring, sê in 'n verklaring die jong seun was by die rivier toe die beskuldigdes – wat onderskeidelik 16, 18 en 19 jaar oud is – hom kaal uitgetrek het en 'n video gemaak het. Die saak teen hulle hou verband met die POPI-wet teen die verfilming en publikasie van 'n video sonder die minderjarige se toestemming.

Die 16-jarige beskuldigde bly onder hul ouers se toesig, terwyl die ander twee op borgtog vrygelaat is. Hulle sal steeds hofverrigtinge bywoon.

Ter illustrasie. FOTO: Grok